NCA Ah Min A Thumi ABSDF Zong Nih Ralhrang An Kah Ve Cang.

Rampi huap kahdaih hnatlaknak (Nationwide Ceasefire Agreement-NCA) ah min a thumi All Burma Students Democratic Front (ABSDF) zong nih hramhram nawlngeihnak latu ralhrang an kah cang hna tiah theih a si.

ABSDF Chairman Tan Khe nih “Kan kah ve cang ko. Kahdohnak hi Myanmar ram pumpi ah ralhrang dohnak a si caah kan ṭhu sawhsawh kho ti lo. Khuapau dohthlennak aa thawkka khan kan i ruah ciami a si ko” tiah a chim.

Jan 15, nizan chunhnu suimilam 2 hrawngah Sagaing ramṭhen le Kachin ramkulh an i tonnak Ayeyarwady tiva zulh in a rak ṭummi ralhrang tilawng pahnih cu Kahtha PDF le ABSDF hna nih 60 mahmah le RPG in kan kah hna tiah Kahtha PDF nih cathanh an chuah. ABSDF cu ralhrang dohnak ah a si khawh chungin dohthlennak ralkap dang hna he i bawm in cawlcangh an i tim tiah theih a si.

ABSDF cu 8888 dohthlennak nih a hrinmi siangngakchia ralkap an si. Kum 1988, Nov 1 ah an rak dirhmi a si. Atu hi Kachin le Karen ramkulh ah tam bik an um i tlangcung hriamtlaibu dang hna he i bawm in kahdohnak ah an i tel tiah theih a si.

Credit : The Chin Post