Kalay Kan Unau Le Thlacam In Bawm Cio Hna Usih.//

Kalaymyo Ah Meithal Thawng Le Hriamngan Puah Thawng Theih A Si!

Nihin January 16, zanlei suimilam 7:00 hrawng in Kalaymyo khuapi ah meithal puah thawng theih a si. Kalay, Sanmyo sang um pakhat nih cun, “Meithal puah thawng a pehpeh in kan theih i hriamngan puah thawng zong kan theih, an thawngpang nih a kan lauter hringhran ko,” tiah The Chin Post ah a chim.

Credit : The Chin Post

(RELCHAP) Dohthlennak Ṭhancho Lei Kan Panh, Ralhrang An Sung Hrimhrim Lai Ti A Fiang.

Khuapau dohthlennak kan tuah caan cu a rauh hlan ah kumkhat a tling cang lai, hi chungah mizapi lei dohthlennak thazaang/dirhmun cu ṭhancho lei a panh deuhdeuh. Cu lioah ralhrang lei cu ṭumchuk lei an panh ve, cu nih cun ralhrang hna cu an sung hrimhrim lai ti a langhter ko tiah NUG Cozah ngandamnak le fimcawnnak vuanci Dr. Zaw Wei Soe nih a chim.

Dr. Zaw Wei Soe nih cun “Hmasa kha cu lamzawhnak, lamzawhnak lawng in a si khawh lo caah i runvennak cah dohnak! I runvennak ca dohnak in atu cu pikpak dohnak le hmun cheukhat ah cun biatak tein kahdohnak an thawk cang. Hihi ṭhancho a si. Khoika hmanh ah kan ṭumchuknak a um lo. Cuticun kan dohthlennak hi ṭumchuk lei panh in kan sung lai lo. Mizapi dohthlennak cu a ṭhangcho deuhdeuh lai i ralhrang cu an sung hrimhrim ko lai” tiah a chim.

Tlangcung hriamtlaibu hna he i pehtlaihnak zongah a hlan nak in ṭhancho lei a panh deuhdeuh. Lungrualnak zong a um deuh. National Unity Consultative Council (NUCC) ah tlangcungmi an i tel deuhdeuh fawn.

“A ngaingai ti ah cun tutan kan dohthlennak hi ralhrang SAC le NUG kar buainak a si lo, kahdohnak zong a si fawn lo. Ralhrang le tlangcung hriamtlaibu hna karlak dohnak zong a si lo. Tutan dohthlennak le kahdohnak cu a dik lomi ralhrang le a dikmi mizapi kar ah a chuakmi dohthlennak le kahdohnak a si, tiah Dr. Zaw Wei Soe nih cun a chim chap.

Ralhrang nih hriamngan le hriamṭha an hman len zongah kahdohnak kip ah an sung lengmang i raldohnak vanlawng tiang an hman cang. Nawlngeihnak an lak cu kumkhat a tling cang lai, atu tiang ṭha tein an uk khawhnak hmunhma a um rih lo, ram pumpi uk (control) ding hi cu a si kho ti lo. Hihi a hlan i nawlngeihnak an lakmi le tutan an i dannak cu a si. Mizapi kan ṭhawnnak le teinak a si hrimhrim lai, tiah Dr. Zaw Wei Soe nih cun a chim.

Credit : The Chin Post