Chin Ram Chung Ah Bomb Ruang Ah Hliamtuar Le Nunnak Liam Mi Minung 44 An Phan.

Chin Ram Chung Ah Bomb Ruang Ah Hliamtuar Le Nunnak Liam Mi Minung 44 An Phan.

Chin ram chung ah SAC ralkap nih nawlngeihnak an lak hnu kahdohnak a chuah ruangah le vawlei phummi bomb ruangah May 24 tiang nunnak liammi le hliam tuar mi minung 44 tiang an phan tiah Institude of Chin Affairs (ICA) nih an khomhsuatmi cazin an langhter.

Khuachung mipi minung 8 an nunnak a liam i, hliamhma tuarmi 17 tiang an phan. A dang nunnak liammi hna le hliamhma tuarmi 19 cu Chin ralkap an si tiin an langhter.

Bomb hliamhnak in nunnak liammi le hliamtuar mi hna lak ah kum tlinglo ngakchia zong an i tel tiah theih a si.

Kan hnu kum November 29, Mindat pengchung ah ummi U Yaung Ngai cu kum 4 tluk simi a fapa he tlanglei an kainak lam ah bomb i lamh sualnak in an nunnak a liam tiah tantakmi a nupi nih a chim.

SAC ralkap le Chin ralkap kar kahdohnak ah kaphnih in bomb hmannak a um na in, Chin ralkap hna nih cun mipi umkalnak hmunhma le lam ah bomb hmanh tibantuk cu a umlo tiah Mindat CDF in chim phuannak nawl ngeitu pakhat nih a chim.

SAC ralkap lei chim phuannak nawl ngeitu Zaw Min Tun nih cun kanmah nih bomb kan hmanh mi cu umhmun khuarnak sakhan humhimnak ding caah kan hmanh mi a si tiin bia lehnak a tuah. Bomb hmanhnak kan tuahmi cu cunglei nawlpeknak a um hnu lawngah kan tuah tiah a chim.

CHRO in Deputy Executive Director Salai Za Uk Ling nih cun bomb hmanh mi hi ramkip raktuknak u-pa-di phung a buar tiah a chim.

SAC ralkap nih nawl ngeihnak an lak hnu kahdohnak a chuah ruangah Chin ram chung khua 300 leng in mipi sing khat leng cu mah umnak hmun kaltak in ralzaam dirhmun an phan.

UNOCHA nih May 18 ni cathanh chuahmi ah 2022 kum hramthawk zarhthum chungah rampi huap in bomb/mine puahnak voi 54 a cang i nunnak liammi 20 le hliamhma tuarmi 80 tiang an phan tiah an thanh.

Credit : The Chin Post