Champhai DC(Deputy Commissioner) Pi Maria CT Zuali Hmundang Ah An Ṭhial!//

Champhai DC(Deputy Commissioner) Pi Maria CT Zuali Hmundang Ah An Ṭhial!

Mizoram mizapi nih an buaipi ngai mi, Myanmar lei in phungning lo in kuva thei a lut mi rak tlaitu Champhai DC Pi Maria CT Zuali cu nizan January 13 ah khan Mizoram cozah nih a rian in ṭhialnak(transfer order) a chuah. Pi Maria CT Zuali leng ah hin Mizoram Cozah lutlai zeimawzat hna cu an rian in an ṭhialkam ve hna. Pi Maria CT Zuali nih hin Additional Secretary rianthar tlai in, Food and Civil Supply(Ei le din phawtzamhnak) lei a tawlrel lai.

Pi Maria CT Zuali hi Myanmar lei in phunning lo kuva thei a lut mi a tawlrel ning ah Mizoram mizapi fak a hlawh tuk nain, a liancia December 2021 lio ah kuva thei ngeitu Lalhruaitluangi, Aizawl, Caltlang Lily veng, ti mi nih Champhai palik sinah Pi Maria dohkalh in FIR a rak ṭial. Mizoram media hna nih an konglam hlathlai in tualchung media linhsattertu bik ah Pi Maria konglam cu a rak lang. Kuhva thei a tawlrelnak he pehtlai in ramchung zatlang bu tam deuh nih an dirkamhnak cathanh an chuah.

CYMA le MCS Association tiang nih Pi maria dirhkamhnak cathanh an chuah lio ah, nizan tihni te ah khan Champhai le a pawngkam Motor ngeitu phufonh hna nih Pi Maria CT Zuali cu a rian chuahtaak in, hmundang ah ṭhialpiak ding in Mizoram cozah lutlai Chief Minister sinah hahnak/nawlnak ca an rak pek. An halnak ca i a langhning ah cun Champhai le a pawngkam Motor ngeitu hna nih eikawlnak ah kum saupi an rak hman cang mi cu Pi Maria nih a hrawhpiak hna. Myanmar lei in Kuva thei a lut mi a um ti lo hnu in mi tampi nih an pawcawmnak an sunghnak kong an langhter.

Mizoram mipi nih Pi Maria Transfer halnak social media i an ceih lio ah Pi Maria thialkamnak nawl cu Nihin January 13, 2022 ah Mizoram cozah nih a chuah. Pi Maria CT Zuali ṭhialkamnak he pehtlai in Mizoram zatlang bu cheukhat nih emergency tonpumhnak an tuah hna i, zei kong dah an ceih ti belte a fiang rih lo. Pi Maria nih a chuahtaak ding mi Champhai DC rian hi Pu James Lalrinchhana nih a tlaih lai.

Credit : The Chin Post

error: Content is protected !!